1 Thessalonians 5

Ísóigo kumíníntavetaamo toꞋmayaa ónaunda-kwasai.

1kentáásí kwaásiyono. Ísóigo Ísumo kumínín-kanaama íma ísareꞋa maankwándááívímbá íma agairáumne. 2kemá ísaraamba noꞋwáámba umóyán-kwáásímó anompintumáívimbo tintenkáán-umai Ísoigo Ísumo éna miráumai kumíníye. 3kwaásimo maarámó sésamo ívéꞋa kawe-kánáávímbá aánoumai máyaumne sénááombanivo avekáámbó éna sáwí-kanaao téna tasáwíꞋa umátinkaniye. aaraigóná kanaamó tisanamó imbá iyámpói kwémarankaiye. mirámó ontembá misáwí-kánááómó éna íma asétinkainda amáparawaivimba tátoraniye. 4kentáásí kwaásiyono. umóyán-kwáásígómó kentí náaindaambo tamaimairáinaꞋo awánéꞋo éꞋa táátaveꞋa ónááombanivo íma túnkaimpimba máyáamba póna Ísóigo Ísumo kumínímba íma táátaveꞋa ónááowe. 5keinárawaꞋa sáma kaiwáí árááꞋmaaꞋa owatá kesáágwáráꞋá íma túnkaiwaindeiya úmpo sáma kaiwáíndéíya úne. íma sáátaveta ónaumne. 6évakarawaimo ombá Ísumo kumínín-imayaa ímo ombá tavúꞋmáímo tuúmó kwáéntenkaamba kwéovo kesáá íya miráyá éta kárákwimaiya kawer-ímáyááyá umáíya ménaumne. 7kwaásima noꞋwáámba tuún-kwáéwasa uwoꞋaóꞋ-nómbó kwénaan-kwaasi noꞋwáámba nésa uwoꞋaóꞋá ónááovo 8kesáá sáma kaiwáí árááꞋmaaꞋa póta íma miráráántá ondayá kawer-ímáyáá umáíya ménaumne. miráumai méta kweukáámbó avérimaiyaamo máyaundantemba ÁánútunkaꞋa agevamái méta kwaásivimba siruntá kwétimeta máyaumne. kweuꞋnéímó súwawaaꞋo ánáan-kwimaimo máyaundantemba Ísu Káráísiti kusiráníntaveta amuꞋmaréta ménaundayaawe. 9Áánútu kwená kwaási-ita umásínkaraimba kentáásí sáwí-mayairakemba Áánútu áwááꞋa simásinkanintavena ímanivo Ísóigo Ísu Káráísiti kentáásí sáwí-mayaigomo tátokaimpinkemba iyásinkenaya kawepátá mósinkanintavena Áánútu kwená kwaási-ita umásínkaraintaawe. 10Ísóigo Ísu Káráísiti kentávénáya ísámai pukáimba póta kumínataamo éta úwoimo máyaunda-kwaasigwara pukáan-kwaasigwaraꞋo éta kweséya ménaumne. 11mindáyaveꞋa moórá-mora-umai túwaꞋnaa eꞋa kawer-áímbá síma-simaꞋa íyamba póꞋa asiramái ménaaowe. áꞋa kwéomba póꞋa mirá úmae iyónááowe.

12kentáásí kwaásiyono. moórá-aimbo asiramái simátíménda ísáaro. keinárawapimba mayáímá maésa kawer-áímbá simátimesa asiramái arupí umátinkanaaontavena Ísóigo miwí usásintinkarain-kwaasi táái taagwiyávóro. 13keinárawapimba miwí mayáí kwémayaantaveꞋa póꞋa miwí táái mósá maréꞋa kentirumbá kwétimeꞋa máéro. keinárawapinkemba moórá-morawai paru umái máéro.

14kentáásí kwaásiyono. asiramái súndaya kavóná-kwaasiyaveꞋa asiramái séꞋa arupí umátínkáaro. táákavuravumo íyan-kwaasi tirumbá asiramátínkáaro. aamoisayán-kwáásígwáráꞋá túwaꞋnaa oro. amápa-kwaasinamba kwempaꞋá aánoumai máéro. 15kembó sáwíꞋo umátínkéwaꞋa anondá miwí sáwíꞋa umátínkáavo séꞋa aambá áúntinkaaro. aasiyaasí miráumai keinárawate umái óꞋon-kwaasigwaraꞋa kaweꞋá umátínkáaro.

16aasiyaasí tirunkó aamoí ínaꞋa méꞋa 17ÁánútumpaꞋa námúnaa símae iyéꞋa íma agándaaro. 18kentópaꞋa óꞋon-oꞋon-tantaaꞋa kawe-tántááꞋá umbai-yántáákwáráꞋá tínímba ÁánútumpaꞋa súwi séꞋa máéro. mirámó ónááomba Áánútu mirá iíyávéna kwéankaiye. Ísu Káráísitiye tarúmai méꞋa ÁánútumpaꞋa amápa-tantaataveꞋa súwi kwésemba Áánútu mirá iíyávéna kwéankaiye.

19Áánútun-amankomba íma aambá áúnankeꞋa 20Áánútun-amankoma simátímakain-aimba kwésimatimiyaꞋa mináímbá íma tínaaemba umáméro. 21amápa-tantaaꞋa taaíntuweꞋa kawe-tántáákáꞋá asiramái méyatoraaro. 22amápaꞋa óꞋon-oꞋo-sawi-yantaataveꞋa aséráaro.

23Áánútu paru kwéumatinkaiwaina ááimban-iye. kwemá keinárawaꞋa kwendéí auráníntaveta námúnaa kwésune. Áánútu kentí imáyáaraꞋa túwawaakaꞋa timankaꞋá kárákwiyinaꞋa kaweꞋá umái ménaaomba Ísóigo Ísu Káráísiti kumíndaraꞋa íma sáwí-aimba kempímbá kwénintaveta námúnaa kwésune. 24Áánútu áraikona ááimba póna kwená kwaási-iꞋa umátinkaindayavena tááyaraiwai kwemó siráinteniꞋa mirá umátinkaniye.

25kentáásí kwaásiyono. ÁánútumpaꞋa kentááyávéꞋa súwaꞋnaa umai námúnaa seró. 26Áánútun-aaiyaveꞋa áraire kwésewai tiyáámba tíméro kwésune. 27Ísóigo simásímakaintaveꞋa asiramái simátimeꞋa séꞋa maankwándááívínkén-kwásáí Áánútun-aaiyavesa áraire kwésewai amáparawai simátíméro.

Ísóigo Ísu Káráísiti aasiyaasí úwoi kwétuwaꞋnaa-intaveꞋa námúnaa kwésune.

kemá Póro siráunda mináímbá kwéanasaiye.

28